Viel spass beim lesen :D

Zwa Fliag´n, de ane fett, de andere dünn
san g´faungen in an Glasl drinn.

De Ane is ganz schrecklich bös
zurnig und dazua nervös,
se zischt wia narrisch kreuz und quer
im Glasl drinnen wüd umher.

De aundare is sehr verdutzt
in Ruhe ihre Fliag´ln putzt
losst se net stearn von den Radau
und schaut se nur de Aundre an,
de panisch ohne G´füh
vergebens ihr Los verändern wü.

´sis auf´d Nacht da Bua kummt z´haus
fischt d´Fliag´n aus dem Glasl raus,
se san heit´s Nachtmoihl für sein Frosch´n
der schnappt nur kurz mit seiner Gosch´n.

Es ging ihnen wie manchen Wesen
die bei den Fliegen sind gewesen.
Denkt´s jetzt noch ob Frau ob Maun
wer vo de zwa woa bessa draun.

Sei gresste Freid is Autofoahn,
nua a Stau mocht eahm zum Noan,
er richt se auf, ganz rot da Kopf,
und d´Faust haut drauf am Hup´nknopf.

Zum Beispü – er biagt o´
Oh Schreck de Mistkibla san do,
und de laan grod – oh Graus,
in Ruhe eanare Kiben aus.

Vua eahm woat scho a Reih,
und jetzt san hinten a scho drei,
da Bluatdruck steigt, ganz rot da Kopf,
de Faust, waßt eh´am Hupenknopf.

Er foat wieda volla Zuan,
am liabst´n war´a ned geburn,
a Tritt auf´s Gas ois wia ned gscheid,
da Zebrastraf´n is ned weit.

A oide Frau grod umme wü,
de Hup´n schreckt sie, und Gebrü,
schrecklich hod des Heandl klungan,
mei wia is de Oide g´sprungan.

Er hod se denkt und dabei g´lacht,
wos hättest ohne Hup´n g´macht.

Noch an, jetzt herrlich guad´n Weinderl,
fiad er no ham die Freinderl,
noch kurzer Foart is er scho do
dann lodt er glei de Spezl´n o.

De Tian wean zuag´haut, ganz apprupt,
seavas alle, dann wiad g´hupt,
De Leit in de Bett´n fluach´n,
an Tritt auf´s Gas
se solln eahm suach´n.

Am aundern Tog gibt’s wieda Zorres,
den Briadern oba lernt a Mores,
vua eahm foat a ödara Hea,
sei Kopf geht hin und her.

„Suachst leicht an Parkplotz oida Maun,
den „Trottl“ oba hupt er an.
Nocha is leichta eahm ums Herz,
beim Autofoahn kennt er kann Scherz.

Du gehst aus´n Haus,
olles im Nebel, kurz a Graus.
Du schaust nach links und rechts wia wüst jetz geh´
überlegst dir´s no und bleibst kurz steh´.

De Auto foahrn bei Tag mit Liacht
damit mas hört und damit mas siacht.
Die Tramway losst si Zeit
bist zum Ziel kummst is no weit.

Endlich is der 6er do
ei´g´stieg´n scho geht´s aun´
im Neonliacht erstroihlt der Wagen
dabei wird g´hustet, net zum Sagen.

Wo du hin willst steigst jetzt aus
besorgst die Soch foahrst wieda z´haus.
Die Wohnungstür sperrst wieder auf
gehst eine und kummst drauf,
daß im Dezember, des is g´wiss
daham beim Tee am schensten is.